វ៉ាស៊ីនតោន៖ សហរដ្ឋអាមេរិកកាលពីថ្ងៃពុធបានច្រានចោលការទាមទាររបស់រុស្ស៊ីក្នុងការរារាំងមិនឱ្យអ៊ុយក្រែន ចូលអង្គការណាតូ ហើយបាននិយាយថាទីក្រុងម៉ូស្គូបានត្រៀមខ្លួនរួចជាស្រេចក្នុងការឈ្លានពាន។

មួយខែបន្ទាប់ពីរុស្ស៊ីបានបញ្ជូនទាហានរាប់ម៉ឺននាក់ទៅកាន់ព្រំដែនអ៊ុយក្រែន សហរដ្ឋអាមេរិកមានការឆ្លើយតប និងព្រមានជាបន្តបន្ទាប់ ហើយបាននិយាយថាសហរដ្ឋអាមេរិកបានត្រៀមរួចរាល់សម្រាប់ព្រឹត្តិការណ៍ណាមួយដែលអាចកើតឡើង។

លោក Antony Blinken បានបញ្ជាក់យ៉ាងច្បាស់ថា សហរដ្ឋអាមេរិកនឹងមិនងាកទៅរកការទាមទារស្នូលរបស់រុស្ស៊ី ដែលមិនឲ្យអ៊ុយក្រែនចូលរួមជាមួយអង្គការណាតូនោះទេ។

លោក Blinken បាននិយាយថា៖ «តាមទស្សនៈរបស់យើង ខ្ញុំមិនអាចច្បាស់លាស់ជាងនេះទេ ទ្វាររបស់អង្គការណាតូគឺបើកចំហ នៅតែបើកចំហ»។

សហរដ្ឋអាមេរិកក៏បានព្រមានអំពីផលវិបាកធ្ងន់ធ្ងរប្រសិនបើរុស្ស៊ីឈ្លានពាន រួមទាំងការដាក់ទណ្ឌកម្មផ្ទាល់ខ្លួនដែលអាចកើតមានលើប្រធានាធិបតី វ្ល៉ាឌីមៀ ពូទីន ហើយអង្គការណាតូបានដាក់ទាហានចំនួន ៨ ៥០០នាក់រង់ចាំផងដែរ។

អគ្គលេខាធិការអង្គការណាតូ លោក Jens Stoltenberg ក៏បាននិយាយថា៖ «ខណៈពេលដែលយើងកំពុងសង្ឃឹម និងធ្វើការស្វែងរកដំណោះស្រាយដ៏ល្អមួយ ការកាត់បន្ថយការកើនឡើងកម្តៅនេះ»។

មន្ត្រីការទូតជាន់ខ្ពស់ម្នាក់របស់សហរដ្ឋអាមេរិកបាននិយាយថាប្រធានាធិបតីរុស្ស៊ី លោក វ្ល៉ាឌីមៀ ពូទីន មានផែនការប្រើកម្លាំងយោធាវាយប្រហារលើអ៊ុយក្រែននៅពាក់កណ្ដាលខែកុម្ភៈខាងមុខនេះ បើទោះជាទីក្រុងម៉ូស្គូបដិសេធការចោទប្រកាន់បែបនេះក៏ដោយ។

បើតាមលោកស្រី Wendy Sherman សហរដ្ឋអាមេរិកនឹងបន្តជំរុញការដោះស្រាយបញ្ហាតាមយន្ដការការទូត ប៉ុន្តែព្រមពេលជាមួយគ្នា ក៏បានត្រៀមខ្លួនរួចរាល់ហើយដែរ សម្រាប់សេណារីយ៉ូអាក្រក់ណាមួយ៕